رسالة من غزة
بأكتبلَك
من جوه حصار
بأكتبلَك من تحت جدار
كان يوم شايل سقف الدار
بأكتبلك من أرضي الحِبلى بالأحرار
بأسمي وبأسم الشهدا والثوار
... بأكتبلَك
... وفي حلقي مرار
***
غزوة غزة
غارسة في قلبي سيف من نار
جيش جرار
كل سلاحه جبن وعار
وشعبي الأعزل واقف صامد
وإنتوا بتختلقوا الأعذار
***
أنده لك
ألاقيك محتار
أسيادك ماسكينلك ذلة
وإنت حمار
لا بتحسب إيه أخرة صمتك
ولا عارف مين اللي بياكلك
ولا بكره مين راح يحتلك
ما هو لازم حيجيلك الدور :
مرسوملنا كلنا إدوار
***
الأخت الكبرى
بايعة شرفها ، ويّا الغاز ، للسمسار
وولادها لو ولّعوا شمعة
أو قالوا بصوت عالي كلمتهم
العسكر يحرقوا دنيتهم :
أسوار جواها أسوار
***
غزوة غزة
شاهدة عليكوا ليوم الدين
مساكين
باصين لكن مش شايفيين
طول ما إنتوا في ليل الخوف مساجين
على فين رايحيين ما إنتوش عارفيين
***
غزة يا أخويا مش حتموت
ولا حتسلم
ولا تنهار
أقفل بابك ، سد ودانك
الّف الف حكاية خسيسة
مهما حتكدب
مهما حتهرب
حتماً برضه حيجي نهار
_______
إيهاب لُطَيِّف - مونتريال